Баткенде "унаа уурдоого аракет кылган" деген шек менен 3 жаран кармалды, алардын бири 15 жашта

Баткенде "унаа уурдоого аракет кылган" деген шек менен 3 жаран кармалды. Алардын бири 15 жаштагы бала экенин 24-март күнү Баткен облустук ички иштер башкармалыгынын басма сөз кызматынан билдиришти.

Маалым болгондой, 22-март күнү Кызыл-Кыя шаарынын 1-кичи районунун 32 жаштагы Султан уулу Салижандын Дэу-Тико үлгүсүндөгү унаасынын эшигин бузуп, белгисиз адамдар аны уурдоого аракет жасашкан. Унаа ээси жалпы 3000 сомдук зыянга учураган. Аталган кылмышка шектүү катары Ноокат районунун Көк-Жар айылынын 18 жаштагы тургуну Р.Р. Ноокат районунун Бел-Орук айылынын 23 жаштагы тургуну Ж.Д. жана Ноокат районунун Ак-Булак айылынын 15 жаштагы тургуну К.Б. кармалды. Алардын үстүнөн КРнын Кылмыш-жаза кодексинин 172-беренесинин негизинде кылмыш иши козголуп, 18 жаштагы Р.Р. жана 23 жаштагы Ж.Д. убактылуу кармоочу жайга киргизилди. Ал эми жашы жете элек К.Б. өлкөдөн чыгып кетпөө тил катынын негизинде коё берилди.