КҮНСЕРЕП: Атамбаев Абдуганиевичтин айласын алты кетирдиби?

Бүгүн, 24-март. Күн ичинде болгон окуяларга саресеп салабыз...

Журналисттер менен жолугушкан президент Алмазбек Атамбаев чек ара кырдаалы, өлкөнүн ички-тышкы саясаты жаатында пикир алышты. "Кыргыз мамлекетинин чечкиндүү кадамдарынан кийин айласын таппай калган Өзбекстан мыйзамсыз аракеттерди жасоого өттү..." Аксыдагы кырдаалды президент ушундай сүрөттөп, кыргыз бийлиги бараткан багытынан кайтпай турганын ишенимдүү айтты.

"Өзбекстан мурда светти өчүрүп коём, газды токтотом деп коркутчу. Акыркы жылдары андай механизмден ажырады, эми айласы түгөнгөндө азыркыдай мыйзамсыз нерселерге барып жатат",- деди Атамбаев.

Кыргыз мамлекети свет, газ боюнча жалдырап Өзбекстандын көзүн тиктебей калганы чын. Энергетикалык шакектен көз каранды болбоо үчүн курулган "Датка-Кемин" линиясынын артыкчылыгын "энергетикмин" дегендин баары айтып жүрүшөт. Республикага үзгүлтүксүз газ жеткирүү милдети "Газпром" компаниясынын мойнуна жүктөлгөн. Кыргыз тараптын Камбар-Ата-1 ГЭСин куруу планы да коңшулардын уйкусун бузуп келет. Президент өз сөзүндө ушул жана көпчүлүк билип-билбеген башка жагдайларды көңүлгө алгандыр...

Аксыдагы Үңкүр-Тоого байланыштуу президент ток этер жерин айтты: "Тоо башкаларга берилбейт, эгер берилсе Сариевдин башы кетет".

Темир Сариев жетектеген өкмөттүн Үңкүр-Тоого байланыштуу айласы кетти. Аталган тоону Өзбекстанга караштуу аймак деп таануу, тоонун башындагы станцияны которуу боюнча интернетке тараган протоколду жалган деп атап, башка документти жарыялады. "Биз тоону башка мамлекетке таандык деп токтом чыгарган эмеспиз",- деп билдирүүдө.

Кербен шаардык кеңешинин депутаты Эргеш Озокеев премьер-министр Темир Сариевдин мындай жоругун элди сыйлабагандык деп атады.

"Сариев жанын жебесин! Анын жиберген документин бурмалап элге жарыялагыдай биз эмне жиндибизби?! Токтом биринчи район акимине келген. Акимден шаардык кеңешке келип түштү. Акимдин башы болсо премьер-министрден токтом келери менен "мунуңар болбойт, Аксынын эли муну укса көтөрүлүп чыгат" деп артка кайтарып жибериши керек болчу. Сариев "андай токтом чыгарган эмесмин" деп актануунун ордуна "туура эмес жазылып калыптыр, кечирип койгула" десе болмок.

"Башка станция курууга жер карап жатабыз" дейт. Уят эле, станция курам десе Үңкүр-Тоонун башынан деле толтура орун табылат, кура бербейби. Премьер-министр Аксыны билбейт, токтомго жөн эле жазып койгон... Жыйынга катышкан министрлер да "андай токтом жок" деп жанын жешүүдө, айласыз күлөсүң да..."- дейт Озокеев.

Эгерде айтканы жалган болсо, мындай олуттуу айып таккан шаардык кеңештин депутатына чара көрүлөрү тууралуу эмне үчүн премьер-министр бир ооз кеп айтпайт? Көпчүлүктөн жашыра турган нерсеси бар өңдүү айтылган маалыматка тактоо киргизүү менен гана чектелип жатканы табышмак...

Борбор шаарда жарандык активисттер Ак үйдүн алдына митингге чыгышып, Сариевден Үңкүр-Тоо боюнча жооп беришин талап кылышты. "Жер саткан жаман адат таап алышты. Муну токтотуу зарыл. Жер саткандар жоопко тартылышы керек",- дешти чогулгандар...

Ички иштер министри Мелис Турганбаев диний эксперт Кадыр Маликов менен жолугушууда ага коргонуу үчүн травматикалык тапанча белек кылганы белгилүү болду. Белгилей кетсек, аталган адиске жакында кол салуу болгон, ага шектелгендер "Ислам мамлекети" тобунун мүчөлөрү экени маалымдалган эле. Министр менен диний адис жолугушууда терроризм, экстремизм коркунучтарын талкуулашкан.

Министрдин тапанча белек кылышы коомчулуктун көңүлүн бурду. Бул өлкө жарандарынын коопсуздугун камсыз кылууда милициянын алсыздыгын моюнга алгандыкпы? Терроризм же кылмыштуулук диний ишмерлердин эле эмес, мамлекеттин, анын ичиндеги бардык жарандардын коркунучу жана көйгөйү го. Жарандарга "өзүңөрдү өзүңөр коргогула" деген ишарат өңдөндү. Өлкөдө эми терроризмди жектеген ар бир жаран жанына курал көтөрүп жүрүшү керекпи? ИИМ республикадагы бардык жарандардын коопсуздугун камсыз кылуу чараларын көрүүгө милдеттүү экенин Турганбаевдин эсине салабыз...

"Кайгым жокто кайненем өлүптүр" деген кыргыздын макалы бүгүн өлкөнүн борборунда далилденди. Өлкө чек арасында олку-солку абал жаралып турганда Бишкекте троллейбус айдоочулары иш ташташты. Майда маселе көрүнгөнү менен, мындай иш шаардыктарга кадимкидей ыңгайсыздык жаратты. Окурмандар чалышып себебин билип берүүнү өтүнүп жатышты. Көрсө, айдоочулар айлыктары көтөрүлбөй жатканына нааразы болуп иш ташташыптыр. "Жетекчибиз жакында маянабыз көтөрүлөрүн айтышкан, бирок жогорулабай жатат" деди троллейбус айдоочуларынын бири.

Мэрия кызматкерлерди көндүрүп, троллейбус каттамы кайра жанданды. Айдоочулардын талаптарын иликтөө үчүн атайын жумушчу топ түзүлгөнү кечке маал кабарланды...

Улуттук коопсуздук мамлекеттик комитети бүгүн оппозиция лидерлери Бектур Асанов менен Кубанычбек Кадыровду кармап кетти. Алар коомдук-саясий кырдаалды туруксуздаштырып, андан ары бийликти күч менен басып алуу тууралуу сүйлөшүүлөр боюнча шектелип жатышат. Кадыров менен Асанов УКМКнын башкы имаратында сурак беришүүдө.