Москвада полиция имаратынын 5-кабатынан түшүп кетип каза болгон кыргыз жаранынын өздүгү аныкталды

Орусиянын Москва шаарында “адамдарды Сирияга жөнөтүп жаткан” деген шек менен кармалган кыргыз жараны 23-март күнү эртең менен полиция имаратынын 5-кабатынан өзүн таштап жиберип каза болгонун Орусиянын ММКлары жазып чыккан эле. Каза болгон адам 22 жаштагы Н.Айдаров аттуу жаран экендигин Кыргыз Республикасынын Орусиядагы элчилигинен билдиришти.

Маалым болгондой, элчиликтин өкүлү Москва шаарынын Түндүк-чыгыш административдик аймагынын ИИБинин Экстремизмге каршы борборунун башчысы менен жолугуп, кырсыктын чоо-жайы адилеттүү иликтениши керектигин белгилеген. Учурда Орусиянын Тергөө комитетинин башкы башкармалыгы бул ишти иликтеп жатат. Эгерде анын өлүмүнө полиция кызматкерлери күнөөлүү болушса, аларды мыйзамдуу түрдө жоопко тартуу элчиликтен талап кылынган.