Кипр мамлекетинин башчысы Никос Анастасиадис: "Учакты басып алуу боюнча окуянын терроризм менен байланышы жок"

Бүгүн, 29-мартта белгисиз адамдар Египеттин өлкө ичинде каттамга чыгуучу жүргүнчү учагын абадан басып алышканын чет элдик ММКлар жазып чыгышты.

Анда айтылгандай, учакта 55 адам бар болгон. Алардын арасында жаш балдар бар экени айтылууда. Учак Александрия шаарынан Каир шаарына учуп бара жатканда жергиликтүү убакыт менен саат 8:30да басып алынганы кабарланган. Алар экипаж мүчөлөрүнөн учакты Кипр мамлекетинин Ларнака шаарындагы аэропортуна кондурууну талап кылышкан жана бул талаптары орундалбаса, учакты жардырышарын эскертишкен. Учурда учак Ларнака аэропортуна кондурулду. Басып алган белгисиз адамдар учак ичинен 20 чакты аял менен балдарды бошотушту. Ал эми учакты басып алган адам АКШнын Ибрагим Абдель Тавап Самаха аттуу жараны экени айтылууда.

Учакты басып алган жаран сүйлөшүүлөрдөн кийин дагы 5 адамды бошотууга макул болду. Ошондой эле Кипр мамлекетинин башчысы Никос Анастасиадистин "бул болуп жаткан окуянын терроризм менен байланышы жок, учакты басып алган адам жеке себептери менен ушул жолго барып жатат" деген билдирүүсүн жергиликтүү басылмалар жазып чыгышты.

Египет президентинин басма сөз бөлүмүнөн "учакты басып алган Саиф ад-Дин Мустафа аттуу жаран" деп башка атты айтышууда.