Токтогул районунда мындан 2 жыл мурун 14 жаштагы кызды зордуктоого шектелип издөөгө алынган жаран Бишкектен кармалды

Токтогул районунан 2014-жылы 14 жаштагы кызды зордуктоого шектелип изделип жаткан жарандардын бири 29-мартта Бишкек шаарынан кармалды. Бул тууралуу бүгүн, 30-март күнү ИИМдин басма сөз кызматынан билдиришти.

Маалыматка ылайык, Кара-Көл шаардык сотунун чечиминин негизинде Азамат Токтошов жана Максат Жумакалиевге "14 жаштагы кызды зордуктаган" деген шек менен издөө жарыяланган. Аталган факт боюнча жүргүзүлгөн иликтөө иштеринин алкагында А.Токтошов кечээ борбордон кармалган.

Эскерте кетсек, аталган жарандар 2014-жылы "14 жаштагы кызды зордуктады" деп шектелип кармалышкан. Ошондой эле "бул кылмышты уюштуруп берген" деген шек менен жабырлануучунун жеңеси кармалган. Кылмышка шектүүлөр райондук соттун чечими менен акталышкан. Бул чечим менен макул болбогон жабырлануучу тарап Кара-Көл шаардык сотуна арыз менен кайрылган. Кара-Көл шаардык сотунун чечими менен 18-мартта "кылмышты уюштуруп берген" деп айыпталган жеңеси 20 жылга эркинен ажыратылган. Ал эми зордуктоо фактысына шектелген Ж.М. жана Т.А. аттуу жарандарга издөө жарыяланган.