Екатеринбургда өспүрүм кыздын жансыз денеси табылды. Ал январдан бери дайынсыз болуп жаткан 13 жашар Айганыш экени айтылууда

Орусиянын Екатеринбург шаарында өспүрүм кыздын жансыз денеси табылды. Ал болжол менен 4-январдан бери дайынсыз болуп жаткан Канат кызы Айганыш экени айтылууда. КРнын Тышкы иштер министрлигинин расмий өкүлү Нурлан Сүйөркулов бүгүн, 4-апрелде SUPER.KG порталына билдиргендей, азырынча табылган өспүрүм дайынсыз болуп жүргөн кыргыз кызы Айганыш экенин айтууга эрте.

"Экспертизанын жыйынтыгы чыкмайынча табылган өспүрүмдүн денесин Айганышка таандык деп айтууга эрте. Учурда бул факт боюнча соттук-медициналык экспертиза дайындалды. Анын жыйынтыгына ылайык, өспүрүм ким экени, эмнеден улам жана качан каза болгону аныкталмакчы",- деди Сүйөркулов.

Маалыматка ылайык, өспүрүм кыздын жансыз денеси темир жол бекети жайгашкан аймактан кечээ кечинде табылган. Жергиликтүү Тергөө комитетинин башкармалыгы табылган өспүрүм издөөдө жүргөн Айганышка окшош болгонун билдирүүдө. Өспүрүмдүн жансыз денесинен эч кандай жаракаттар табылган эмес жана анын тоңуп каза болгону болжолдонуп жатат.

Эске салсак, жоголгон кызды издөөдө бардык тийиштүү тергөө амалдарын жүргүзүү үчүн "жашы жете электи өлтүрүү" беренеси менен кылмыш иши козголгон. Укук коргоо органдарынын маалыматына караганда, Айганышты 23 жаштагы эжеси кыргыз жеринен Орусияга өткөн жылдын май айында алып кеткен. Атасы абакта болгондуктан, Айганыш апасына жардамдашуу үчүн Орусиядан айына 4 миң рублдан акча салып турган.