Малайзияда өткөн Эл аралык жаш ойлоп табуучулар олимпиадасында кыргыз окуучулары 5 алтын медаль тагынышты

1-3-апрель аралыгында Малайзиянын Пенанг шаарында "Malaysian International Young Inventors Olympiad" олимпиадасы (Эл аралык жаш ойлоп табуучулар олимпиадасы) болуп өттү. Ага дүйнөнүн 12 өлкөсүнөн окуучулар катышты.

Кыргыз мамлекетинин атынан олимпиадага “Себат” Эл аралык билим берүү мекемесинин Кадамжайдагы “Семетей” лицейинин, Ош шаарындагы “Себат” кыздар лицейинин, Ош шаарындагы “Сема” лицейинин, Кызыл-Кыя шаарындагы И.Раззаков атындагы лицейдин, Токмоктогу Ж.Баласагын атындагы лицейдин жана Бишкек шаарындагы Ч.Айтматов атындагы балдар лицейинин окуучулары катышты. Жыйынтыгында кыргыз жаштары 5 алтын, 6 күмүш жана 13 коло медалга ээ болушту.

"Malaysian International Young Inventors Olympiad" олимпиадасы Малайзиянын Билим берүү министрлиги тарабынан уюштурулган. 2016-жылы бул сынакка 216 долбоор катышып, алардын ичинен кыргыз өлкөсүнөн 24 долбоор көрсөтүлгөн.