Түркияда "сойкуларды иштетет" деген шек менен Кыргыз Республикасынын жана Азербайжан жарандары кармалышты

Түркия мамлекетинин Адана шаарында Кыргыз Республикасынын жана Азербайжан мамлекетинин жарандары "сойкуларды иштетет" деген шек менен кармалышты. Бул тууралуу бүгүн, 7-апрелде чет элдик басылмалар жазып чыгышты.

Маалыматта айтылгандай, полиция кызматкерлерине аталган шаардын Сейхан аймагындагы жергиликтүү тургундары кайрылышкан. Алар Кыймылсыз мүлк боюнча агенттиктин ишин аткаруу үчүн алынган батирден сойкулук кызматтары көрсөтүлүп жатканын билдиришкен. Ыкчам иликтөө иштеринин алкагында аталган даректен азербайжан улутундагы 40 жаштагы Б.Хаббат жана 35 жаштагы Б.Айсулуу аттуу кыргыз жараны "сойкуларды иштетип жатышат" деп кармалышкан. Кармалгандар өз мамлекеттеринен кыздарды "жумуш менен камсыз кылабыз" деп чакырып, аларды сойкулук кызматтарына мажбурлагандарын билдиришкен.

Полиция кызматкерлери кардар катары аталган дарекке барып, болжол менен 350-370 долларга кыздарды жалдашып, ал жерден 2 азербайжан жана 1 кыргыз кызын кармашкандыгы маалыматта айтылган. Ал кыздар ошол жакта эки айдан бери иштеп жатышканы белгилүү болгон. Полиция кызматкерлери Б.Хаббат жана Б.Айсулууну кармап, андан кийин 36 жаштагы Т.Али аттуу алардын жетекчисин кармашкан.

Кармалган аялдар өлкөдөн чыгарылат. Ал эми "аларды мажбурлап иштетип жаткан" деп айыпталгандардын иши соттук кароого өттү.