БУУнун өкүлдөрү Ошто 2010-жылдагы коогалаңдан кийин тынчтык 15,1 миллион долларга кантип орнотулуп жатканын текшеришти (фоторепортаж)

4-8-апрель күндөрү Бириккен Улуттар Уюмунун Тынчтык орнотуу фондунун өкүлдөрү Кыргыз Республикасында расмий иш сапары менен болушмакчы.

Бул иш сапардын негизги максаты - өлкөдө тынчтык орнотуу жаатындагы долбоорлордун ишмердүүлүгү менен таанышуу. Бул долбоорлор 2013-жылы ишке ашырыла баштаган. Алар адам укуктарын коргоого, тынчтыкты бекемдөөгө, көп тилдүү билим берүүгө багытталган. Долбоорлорду ишке ашырууга БУУнун Тынчтык орнотуу фонду жалпысынан 15,1 миллион доллар бөлүп берген.

Иш сапардын алкагында кечээ, 6-апрелде эл аралык делегация Ош шаарын кыдырды. Алгач делегация Ош облусунун Шарк айылындагы Абу Али ибн Сина атындагы орто мектебине барды.

Ош облусунун Шарк айылындагы Абу Али ибн Сина орто мектебинин директору Рано Юлчиеванын айтымында, окуу жайда БУУ тарабынан бөлүнгөн акча каражатына футбол аянтчасы салынган. "Долбоордун негизги максаты - окуучуларды спорт аркылуу ынтымакка чакыруу, жаштар арасында кылмыштуулуктун алдын алуу, спортко кызыктыруу, мелдештерге катышууга жардам берүү. Мындан тышкары бул долбоор менен мектепте сабактар кыргыз, өзбек жана орус тилинде бериле баштады. 2012-жылга чейин сабактар өзбек тилинде гана өтүлчү. Жалпысынан мектепте 435 бала окуйт",- деди мектептин директору.

БУУнун Тынчтык орнотуу фондунун директорунун орун басары Мари Ямашита бул долбоор аймакта тынчтыкты орнотууга багытталган иш-чаралардын башталышы деп үмүттөнөрүн билдирди. "Бул жердеги жаштар "тынчтык" жана "тынчтыкты орнотуу" деген сөздөрдү жогору баалаганына абдан кубанычтамын. Ошто буга чейин өтө жаман окуя болгон. Жаштар, жергиликтүү бийлик ошол окуянын кесепеттерин жоюу боюнча иштеп жатышканы кубандырат",- деди Ямашита.

Шарк айылынан соң эл аралык делегация Амир-Темур шаарчасындагы Амир-Темур жаштар борборуна жөнөдү. Бул жерде БУУнун Тынчтык орнотуу фондунун жардамы менен эки кабаттуу имаратта окуу борбору ачылган. Анда орус, англис тилдери, компьютер сабактары өтүлөт. Жаштар бул жерге каалаган убакта келишип, ар кандай маселелерди талкуулай алышат. Борбордун жетекчисинин айтымында, сабактар акысыз өткөрүлөт.

Бириккен Улуттар Уюмунун Кыргыз Республикасындагы туруктуу өкүлү Александр Аванесовдун айтымында, өлкөдө БУУнун жардамы менен ишке ашырылган долбоорлор мындан ары эми жергиликтүү бюджеттен каржыланышы зарыл. "БУУнун фонддорунда акча каражаттын көлөмү чектелген да, башталган долбоорлорду түбөлүк каржылай албайт. Ошондуктан эми долбоорлор жергиликтүү бюджеттерден каржыланышы керек. Республикалык жана жергиликтүү бюджеттер биргеликте ушундай Амир-Темур жаштар борбору сыяктуу долбоорлорду ишке ашырса туура. Биз баары менен сүйлөшкөнгө даярбыз. Эл аралык делегациянын өкүлдөрү жакшы жетишкендиктерди көрүп кубанычта болушууда. Бөлүнгөн акча каражатынын туура пайдаланышы абдан маанилүү",- деди Аванесов.

Мындан кийин БУУнун делегациясы Ош шаардык мэриясына барып, шаар башкармалыгы менен жолугушту.

Ош шаарынын мэринин биринчи орун басары Замирбек Aскаров Ош шаарындагы коомдук-саясий абал туруктуу экенин белгилеп: "Ош шаардык мэриясы жарандардын жашоосун жакшыртуу, достукту бекемдөө иштерине колдоо көрсөтүүгө даяр",- деп билдирди.

БУУнун Тынчтык орнотуу фондунун директорунун орун басары Мари Ямашита фонд Ош шаарында 3-4 жылдан бери ишмердүүлүк жүргүзүп жатканын белгиледи. "Этностор аралык чыңалууну жоюу боюнча ресурстарга жетүү маселелерин чечүүдө бизге жакшы саясий колдоо болуп жатканы байкалууда. Шаардыктардын арасында ынтымак жана достукту бекемдөө демилгелери мындан ары да улантылат деген үмүттөбүз. Ош облусунда ишибизди кеңири жайылтууну көздөп жатабыз",- деп билдирди Ямашита.

Жолугушуунун соңунда вице-мэр Замирбек Аскаров аталган фонддун директорунун орун басары Мари Ямашитага Ош мэриясынын атынан белек тапшырды.

Айта кетсек, жакынкы арада иш сапарынын алкагында БУУнун делегациясынын мүчөлөрү КРнын Президентинин аппарат башчысы Фарид Ниязов, КРнын Президентинин аппарат башчысынын орун басары Мира Карыбаева менен жолугушат. Ошондой эле делегация Баткен облусунда да бир катар жолугушууларды өткөрмөкчү.