13 жаштагы кызды зордуктоого айыпталган жарандын жакындары кызга ири суммадагы акча каражатын сунушташкан

Талас облусунда 13 жаштагы кызды зордуктоого айыпталган жарандын жакындары кызга ири суммадагы акча каражатын сунушташканын жабырланган кыздын эжеси Рахима Айкымбаева 8-апрелде өткөргөн маалымат жыйынында билдирди. Бирок кыздын туугандары сунушталган акчаны албай коюшкан.

“Зордуктоого айыпталган 32 жаштагы Эрлан Дөлөновдун бир туугандары бизге 14 миң доллар сунушташкан. Бирок биз ал акчаны албай койгондон кийин алар акчаны Бакай-Ата райондук соту Ташкараевага сунушташса керек”,- деп айтты жабыр тарткан кыздын эжеси.

Соттук ишти биринчи Бакай-Ата райондук соту карап, алар айыпталуучуну үй камагына бошотуп жиберишкен. Буга нааразы болгон тарап облустук сотко кайрылган. Талас облустук соту да райондук соттун чечимин күчүндө калтырган. Кыздын жакындары бул иш боюнча акыйкат чечимди Жогорку Сот чыгарат деген үмүттө турушат.

Айыпталып жаткан Эрландын үй-бүлөсү, эки кыз, бир уулу бар экендиги жана ал жабыр тарткан кызга карата зордук-зомбулук аракеттерин 2011-жылдан бери кылып жүргөнү белгилүү болгон. Ошондой эле жабыр тарткан Эрландын тууганы болгон.