Патрулдук милиция бир күндүн ичинде Чүй облусунун аймагынан 136 унаага айып салды

Патрулдук милиция кызматы 24 сааттын ичинде Чүй облусунун аймагынан 136 унаага административдик айып салганын SUPER.KG'ге 8-апрелде Чүй облустук ички иштер башкы башкармалыгынан билдиришти. Анын 116сы жол эрежелерин одоно бузгандыгы үчүн токтотулган. Ал эми 4 айдоочу унааны мас абалда айдап бара жатканда кармалган. Жалпысынан унаалардын 28и айып жайына токтотулган.

Айта кетсек, коомдук коопсуздукка көз салып, тартипти сактоого милдеттендирилген патрулдук милиция 1-апрелде Бишкекте, Чүй облусунда жана Ысык-Көл облусунда өз иштерин баштаган. Жол кыймылындагы эрежени сактоону көзөмөлдөө үчүн Бишкек шаары боюнча 800 милиция кызматкери, Чүй облусу боюнча 400 милиция кызматкери жана Ысык-Көл облусу боюнча 160тан ашык кызматкер тартылган. Патрулдук милиция 1-июлдан тарта бүтүндөй республика боюнча иштеп баштайт.