Бишкекте "чала таанышынын 6 миллион сомго бааланган унаасын сатып жиберген" деп шектелген жаран кармалды

Бишкек шаарында "чала таанышынын 6 миллион сомго бааланган унаасын сатып жиберген" деп шектелген жаран кармалды. Бул тууралуу бүгүн, 8-апрелде Бишкек шаардык ички иштер башкы башкармалыгынан билдиришти.

Маалыматка ылайык, милицияга арыз менен И.Р. аттуу жаран кайрылган. Ал 5-февраль күнү анын чала таанышы ишенимине кирүү менен Мерседес Гелендваген G55 үлгүсүндөгү унаасын алып, ордуна Тойота Ленд Крузер 570, Тойота Ленд Крузер 470 жана Мазда Трибут үлгүсүндөгү унааларын берем деп убадалап, алган унаасын башка адамга сатып жибергенин билдирген. Келтирилген чыгымдын жалпы суммасы 6 миллион сомду түзгөн.

Жүргүзүлгөн иликтөө иштеринин алкагында кылмышка шектүү катары 26 жаштагы А.И. аттуу жаран кармалган. Учурда ал убактылуу кармоочу жайга камакка алынып, бул факт боюнча иликтөө жүрүүдө.