Ошто 1500 адамдын катышуусунда массалык марафон орун алды (фоторепортаж)

Ош шаарында бүгүн, 9-апрель күнү Тарых жана маданият жылына карата спорттук иш-чара болуп өттү. Ага Ош шаарынын биринчи вице-мэри Замирбек Аскаров, шаардагы, облустагы мекеме-ишканалардын жетекчилери жана кызматкерлери, 45-60 жаштан жогорку курактагы эркектер жана аялдар, саламаттыкты сактоо, күч түзүмдөрүнүн кызматкерлери жогорку, орто окуу жайлардын студенттери, окуучулар катышты. Бул тууралуу мэриядан кабарлашты.

Маалыматка ылайык, биринчи вице-мэр З.Аскаров Ош шаардык мэриясы ар кандай максаттагы спорттук иш-чараларды колдоого даяр экенин билдирип, шаар тургундарын жана жаштарды спорт менен машыгууга чакырып өттү.

“Мен сергек жашоону тандайм” деген ураан менен өткөн спорттук иш-чаранын катышуучулары 400, 500, 1500, 2200 метр аралыкка чуркашты. Жеңүүчүлөргө Ош шаардык дене тарбия жана спорт комитети тарабынан дипломдор, кубоктор жана баалуу белектер берилди.

“Иш-чаранын негизги максаты спортту калк арасында пропагандалоо, аларды спорт менен машыгууга үндөө ошондой эле шаардыктардын маанайын спорт аркылуу көтөрүү болуп эсептелет”,- деди шаардык дене тарбия жана спорт комитетинин төрагасы К.Саркарбаев.

Иш-чарага жалпысынан 1500дөн ашуун адам катышты.