Алмазбек Атамбаев Жогорку Кеңешке премьердин министрлерди иштен алуу сунушун киргизүү укугун кеңейтүүнү сунуштады

Президент Алмазбек Атамбаев парламентке "Өкмөт жөнүндөгү" мыйзамда премьер-министрдин министрлерди кызматынан бошотуу тууралуу сунуштарды киргизүүсүн чектеген кемчиликтерди жоюуну сунуштады. Бул тууралуу бүгүн, 11-апрелде президенттик аппараттын басма сөз кызматы билдирди.

Министрди кызматынан алуу сунушунда премьер-министрди негизсиз чектеген мүчүлүштүктөрдү жоюу зарылдыгы жаралганы айтылат маалыматта. Тиешелүү кат бүгүн Жогорку Кеңештин депутаттарына президенттик аппарат тарабынан жөнөтүлдү.

Белгилей кетсек, жакында премьер-министр Темир Сариев президентке транспорт жана коммуникация министри Аргынбек Малабаевди кызматтан алуу сунушун киргизген. Бирок президенттик аппарат сунушта тактай турган укуктук жагдайлар бар экенин белгилеп, аны артка кайтарган.