Ош. Жарнактарды илүү үчүн коюлган 100дөн ашык такталар турса да, жарыялар туш келди чапталып жатат

11-апрелде Ош шаарынын мэриясы тарабынан жарнактарды илүүнүн эрежеси боюча атайын рейд уюштурулду. Рейддин жүрүшүндө шаардын борбордук көчөлөрүндө жайгашкан аялдамаларда, жол боюнда орнотулган көрнөк-жарнактардын эрежелери текшерилип, жарнак ээлерине түшүндүрүү иштери жүргүзүлдү.

Мэриядан кабарлашкандай, Ош шаары боюнча 54 аялдамада көрнөк-жарнактарды илүү үчүн 74, коомдук жайларда эс алуу жайларында 100дөн ашуун такталар орнотулган.

“Атайын көрнөк-жарнактарды илүү үчүн такталар болгонуна карабай жарыя берүүчүлөр каалаган жерине илип кетип жатышат. Бул шаарыбыздын тазалыгын жана көркүн бузат. Ошондуктан жарыя ээлерине эскертүү каттарын жөнөтүп жатабыз, бирок көпчүлүк буга кайдыгер карап жатат",- деди Ош шаардык мэриясынын Муниципалдык менчик башкармалыгынын жарнак жана дизайн бөлүмүнүн башчысы Нурбек Азимбеков.

Жарнак ээлери жарыя кагаздарын жол боюндагы бак-дарактардан алып, тазалоосу керек. Эгерде бул иш-аракеттер аткарылбаса, административдик чаралар көрүлөт.