Супер-Инфо
super.kg видео
Футболчу Криштиану Роналду "Рио-де-Жанейро-2016" Олимпиадасында Португалиянын олимпиадалык курамасына ойноодон баш тартты
Португалия курама командасынын капитаны Криштиану Роналду "Рио-де-Жанейро-2016" Олимпиадасына олимпиадалык курама менен баруудан баш тартты. Бул тууралуу чет элдик маалымат булактары кабарлайт.
Анын мелдешке катышуудан баш тартканына Европа чемпиондугуна катыша турганы себеп болгону айтылууда. Себеби Европа биринчилиги 10-июндан 10-июлга чейинки аралыкта Францияда өтөт. Олимпиада оюндары болсо 5-21-август аралыгында өтөт. Бул футболчунун жайкы эс алуусун бир топ кыскартып, кийинки футболдук сезонго даярдык көрүүсүнө кыйынчылык туудурат.
Кошумчалай кетсек, Олимпиада оюндарына 23 жашка чейинки курактагы футболчулардан түзүлгөн курам катышат. Жобо боюнча команда курамын 23 жаш курагынан ашкан 3 футболчу менен толуктоо укугуна ээ.
Кыргыз мамлекетинин олимпиадалык курамасы Азия чемпиондугунун тандоо турунда утулуп, Олимпиадага жолдомо алуу үчүн күрөшкө катышпай калган. Январь айында жаштар арасында Катарда өткөн Азия чемпиондугу ошол эле учурда Олимпиадага жолдомо ойнотулуучу мелдеш болуп эсептелинген.
Кыргыз мамлекетинен Олимпиадага жолдомо алган азырынча 9 спортчу бар. Алар жеңил атлетчилер Мария Карабицкая, Юлия Андреева, Дарья Маслова, грек-рим күрөшүнөн Арсен Эралиев, Жанарбек Кенжеев, Мурат Рамонов, эркин күрөштөн Магомед Мусаев, кыз-келиндер күрөшүнөн Айсулуу Тыныбекова жана мушкер Эркин Адылбек уулу.
0
1 |