Бишкекте айдоочу эвакуаторду сүзүп, окуя болгон жерден көз жумду. Унаа ичиндеги жубайы жана баласы оор жаракаттары менен ооруканага жеткирилди

Бишкекте жеңил унаанын айдоочусу эвакуатор унаасын сүзүп каза болгонун бүгүн, 18-апрелде Жол-патрулдук милициясынын басма сөз кызматынан билдиришти. Ал эми кырсыктан жаракат алган айдоочунун жубайы менен баласы оор абалда ооруканага жеткирилди.

Маалым болгондой, 17-апрелде болжол менен саат 15:00дө Гагарин көчөсүнөн Ниссан Примера үлгүсүндөгү жеңил унаа батыштан чыгышка карай баратып эвакуаторду сүзүп алган.

Эвакуатордун айдоочусунун айтымында, ал унаасын жолдун жээгине токтотуп, өзү дүкөнгө кирип кеткен. Катуу үндү укканда сыртка чыкса, Ниссан Примера үлгүсүндөгү унаа эвакуаторунун артынан келип сүзүлгөнүн көргөн.

Азыркы тапта иликтөө иштери жүрүүдө.