Бишкекте күйөөсүн жиликтеген келиндин иши боюнча соттук отурум 27-апрелге дайындалды

Борбор калаада күйөөсүн жиликтеген 26 жаштагы С.Айдайдын иши боюнча соттук кароо 27-апрелге дайындалды. Бул тууралуу SUPER.KG порталына шаардык соттун басма сөз кызматынан билдиришти.

Маалыматка ылайык, соттук отурум Октябрь райондук сотунда каралмакчы. Буга чейин бул ишти карап жаткан судья шаардык сотко которулуп кеткендигине байланыштуу соттук иш башка соттун кароосуна өткөрүлүп, 4-апрелге дайындалган. Бирок ал күнү ишти карай турган судья бошобой калгандыгына байланыштуу соттук кароо болгон эмес.

Айта кетсек, 2015-жылы 14-августта Бишкектин 5-кичи районунда таштанды челектеринин биринен эркек адамдын дене бөлүктөрү: кесилген колдору жана буттары табылган. Анын эртеси өлтүрүлгөн адамдын башы Фучик көчөсүнөн, денесинин дагы бир бөлүгү борбордогу чайканалардын биринин жанынан чемоданга салынган абалда табылган. Тергөөнүн жүрүшүндө кылмышка шектүү катары маркумдун аялы 18-августта кармалып, ал кылмышын моюнуна алып, күйөөсү экөөнүн ортосунда уруш чыгып, аны бычактап, кийин аны жиликтеп салганын билдирген. Айыпталуучу менен маркум Эрлан Оркошов 4 жыл бирге жашашкан, ортосунда 2 уулу бар.