Министр Кубатбек Боронов Сузакта селден жабыр тарткан эл менен жолукту

Бүгүн, 20-апрель күнү өзгөчө кырдаалдар министри Кубатбек Боронов Жалал-Абад облусунун Сузак районундагы Барпы айылында селден жабыр тарткан эл менен жолукту. Бул тууралуу Өзгөчө кырдаалдар министрлигинин басма сөз кызматы билдирди. Министр иш сапар алкагында Ала-Бука районунда болуп, селден жабыр тарткан тургундар менен жолугат.

Эскерте кетсек, 18-апрелге караган түнү катуу жааган жамгырдын кесепетинен Сузак, Ала-Бука, Аксы райондорундагы айылдарды сел каптап, бир катар чыгымдарды алып келген. Жалпысынан Жалал-Абад облусу боюнча каналдын жээгине жакын жайгашкан 7 турак үйгө суу кирип, 6 турак үйдү сел жууп кетүү коркунучу пайда болгон. Ошондой эле 2 таза суу линиясы, 3 чакырым унаа жолу, машина өтүүчү көпүрө, жөө адамдар өтүүчү бир көпүрө селден зыянга учураган.

Боз-Чычкан айылында "Ынтымак" №85-мектебинин имаратынын айланасына суу толуп, спорт аянтчасын толугу менен ылай каптаган. Тазалоо иштери сел калдыктары кургагандан кийин айылдык аймак тарабынан аткарылат.