Бишкекте эки күн ичинде 3 адам баңгизат менен колго түштү

18-19-апрель күндөрү Бишкекте баңгизат менен 3 адам кармалды. Бул тууралуу Бишкек ШИИББинин басма сөз кызматы билдирди.

Маалым болгондой, 18-апрелде саат 23:00 чамасында Аламүдүн районунда патрулдук милициянын кызматкерлери шектүү адамды токтотуп, текшерүүнүн жүрүшүндө 226 грамм марихуана табышкан. Ал Бишкек шаарынын 40 жаштагы тургуну экени аныкталды.

19-апрелде ыкчам иликтөө амалдарынын жүрүшүндө Сокулук районунун 34 жаштагы тургуну кармалып, андан 860 грамм марихуана табылган. Ошол эле күнү саат 19:00 чамасында Ак-Бата конушундагы үйлөрдүн биринде баңгизаттарды сактоо боюнча шектелген адам колго түшкөн. Текшерүү учурунда 750 грамм гашиш табылган. Ал буга чейин соттолбогон, 29 жаштагы жумушсуз экени аныкталды.

Учурда аталган фактылар боюнча кылмыш иши козголду. Тергөө иштери уланууда.