Ошто "кызганычтан улам сүйлөшкөн кызын бычактаган" деп шектелген жаран алгач өз өмүрүн кыюуну пландап, кийин кызды жана анын жаңы жигитин өлтүргөнгө аракеттенгени аныкталды

Ош шаарында "кызганычтан улам сүйлөшкөн кызын бычактаган" деген шек менен кармалган жаран алгач өз өмүрүн кыюуну пландап, кийин кызды жана анын жаңы жигитин өлтүргөнгө аракеттенгени аныкталды. Бул тууралуу бүгүн, 22-апрелде SUPER.KG порталына Ош шаардык ички иштер башкармалыгынан билдиришти.

Маалым болгондой, 19-апрелде саат 13:00 чамасында Ош шаарынын А.Навои атындагы эс алуу багында жигити менен сейилдеп жүргөн Чоң-Алай районунун 24 жаштагы К.П. аттуу тургунун белгисиз адам бычактап кеткен. Кыздын жанындагы мырзаны да бычак менен коркутуп, ал окуя болгон жерден качып кетүүгө үлгүргөн. Кийин кылмышка шектүү жабырлануучунун 29 жаштагы С.Ж. аттуу жигити экени аныкталган. Ал милиция кызматкерлерине берген көрсөтмөсүндө жабырлануучу менен 4-5 айдан бери сүйлөшүп, ага үйлөнүүгө ниеттенип жаткандыгын, мындай кадамга барганына сүйлөшкөн кызынын башка менен жүргөнү себеп болгонун билдирди.

Иликтөө иштеринин алкагында кылмышка шектүү, жабырлануучу жана аны менен бирге сейилдеп жүргөн жигит бир батирде жашап жүрүшкөнү да аныкталган. Кызды бычактаган жаран чогуу жашаган кошунасы Саматка "кызга жакындаба" деп 5 жолу эскертүү бергенин кошумчалады. Окуя болгон күнү кылмышка шектүү жабырлануучу жана анын кошунасы Самат сейил бакта отурганын көрүп, алгач өзү муунуп өлүүгө аракеттенип, бирок ылайыктуу жер таппай, кийин алардан өч алуу үчүн аларды өлтүрүүнү көздөгөнүн билдирди.

Учурда кылмышка шектүү 2 айга камакка алынып, бул факт боюнча тергөө амалдары жүрүүдө. Ал эми жабырлануучу кыз оор абалда ооруканада экени маалым болду.