СУПЕРСТАН: "Жүгүнө берип чарчап уктап калыпмын, көзүмдү ачсам бир аял жоолугун үстүмө таштап чыгып баратыптыр"

SUPER.KG порталынын "Суперстан" бөлүмүндө "Келиндин келгендегиси эсинен кетпейт" деген тема талкууга алынууда.

Темадагы билдирүүлөрдөн:

"Апам жаңы келин болуп келгенин айтып калчу эле, ал кезде нике кыйгандын эртеси чач өрүү деген салт бар болчу экен. Аялдарды, өкүл апаны чакырып алып келинди ортого отургузуп башын сары май менен майлап чачын өрүшчү экен. "Андан кийин сары май жыттанып, башым оорлошуп, жуусам да жыты кетпей абдан кыйналгам" деп эмдигиче айтат".

"Жаңы келин болуп барганда төртүнчү күнү көшөгөдөн чыктым. Жолдошум жумушка кеткен. Кечки тамакка оромо жасайын деп камдана баштасам, картошка калбаптыр. Кайненем кичинекей кайын сиңдимди кошуп дүкөнгө жиберди. Дүкөндөн чыкканда кайын сиңдим чуркаган бойдон көчө менен безип кетсе болобу?! Жашаган көчөмдүн атын билбейм же кайнатамдын атын эч качан укпаптырмын, телефон жок. Болжолдоп үйдү таап келдим бир маалда. Эки көзүм эки тоо. Кайненем көрүп "Эмне болду?" дейт. "Жолдошума эч нерсе айтпай эле коёюңуз" десем, эчак маалымат жетип калыптыр. Ал келип каткырып жатат. Азыр эстесем күлкүм келет".

"Эжем турмушка чыккан жылы кайнатасына уят болуптур. Эжемдин боюнда бар, ай-күнү жетип калган экен. Жердеги столго чай даярдап жатыптыр. Кайнатасы столдун бурчунда отурган экен. Анан эжем чай алып келип, столдун бурчуна таянып отурайын десе, столдун аркы бурчу көтөрүлүп, чай кайнатасына чачылып кетиптир. "Уялганымды айтпа" деп күлүп калат".

"Мен дагы келин болуп барганда бир күн кечке жүгүнө берип, акырында чарчап уктап калыптырмын. Көзүмдү ачсам бир аял жоолугун үстүмө таштап чыгып баратыптыр, уялганымды айтпа".

Талкууга кошулгуңуз келсе, бул жакка кириңиз.