Чоң Чүй каналына түшүп кеткен БМВнын айдоочусунун жансыз денеси табылды

23-апрелде Аламүдүн районундагы Лебединовка айылында Чоң Чүй каналына түшүп кеткен БМВ үлгүсүндөгү унаанын айдоочусунун жансыз денеси табылды. Бул тууралуу бүгүн, 24-апрелде Өзгөчө кырдаалдар министрлигинин басма сөз кызматы билдирди.

Маалыматка ылайык, унаа саат 20:30 чамасында Жибек-Жолу – Калинин көчөлөрүнүн кесилишинде орун алган. "Окуя болгон жерге №1-ӨКБнын жана Бишкек шаардык 161-кызматынын суучулдары барышып, 1952-жылы туулган К.А. аттуу славян улутундагы адамдын жансыз денесин чыгарып, фура унаасы менен БМВны суудан сүйрөп чыгарышкан",- деп айтылат маалыматта.

Айта кетсек, бүгүн окурман SUPER.KG порталына кайрылып, аталган каналга түшүп кеткен унааны суудан чыгарууга 7 сааттай убакыт кеткенине нааразычылыгын билдирген.