ЖЫЛНААМА, 25-АПРЕЛЬ: Бүгүн Безгек илдетине каршы күрөшүүнүн эл аралык күнү белгиленет

2007-жылдан тарта 25-апрелде Бүткүл дүйнөлүк безгек оорусуна каршы күрөшүү күнү белгиленип келет. Мындай чечим 2007-жылы Бүткүл дүйнөлүк саламаттык сактоо уюмунун 60-сессиясында кабыл алынган. Максаты - бардык өлкөлөрдө безгек оорусуна каршы күрөшүүдө эффективдүүлүктү камсыздоо.

Безгек - кадимки малярия оорусу. Жер шарында жылына 500 миллионго жакын адам безгек оорусу менен ооруйт. Анын ичинен 2 миллионго жакыны көз жумат. Бул оорудан өзгөчө 5 жашка чейинки балдар азап тартышат. Оорудан көбүрөөк жапа чеккендерге Африка континентинин Сахара чөлүнүн түштүгүндө жашоочулар, Түштүк-Чыгыш Азиянын (негизинен Индия, Ооганстан), Таиланддын тургундары кирет.

Кыргыз жеринде безгек өткөн кылымдын баш чендеринде кеңири жайылган оорулардын бири болгон. Эпидемияга каршы иш-чаралардын жыйынтыгында бул оору өлкөдө 1950-жылдары толугу менен ооздукталган. 1980-2000-жылдар аралыгында безгектин жайылышы сейрек мүнөздө болгон. 2002-жылдан тарта кыргыз жеринде безгек оорусу баш көтөрүп, бирок 2006-жылы кырдаал жөнгө салынган.