Баткенде "мал кайтарып жүрүп Өзбекстандын чек арасына өтүп кеткен үч өспүрүмгө карата күч колдонулду" деген маалымат боюнча текшерүү иштери жүрүүдө

Баткенде "мал кайтарып жүрүп Өзбекстандын чек арасына өтүп кеткен үч өспүрүмгө карата чек арачылар тарабынан күч колдонулду" деген маалымат боюнча текшерүү иштери жүрүүдө. Бул тууралуу бүгүн, 25-апрелде Мамлекеттик чек ара кызматынын басма сөз бөлүмүнөн билдиришти.

Маалым болгондой, Чек ара кызматынын кызматкерлерине арыз менен Баткен облусунун Таян айылынын тургуну кайрылган. Ал мал кайтарып жүрүп Өзбекстандын чек арасынан өтүп кеткен өспүрүмдөрдү кайтарып берүүгө көмөктөшүүнү өтүнгөн. Чек арачылардын эки тараптуу сүйлөшүүлөрүнөн кийин 3 өспүрүм жана 9 баш мал кыргыз тарапка кайтарылып берилген. Чек арачылар тарабынан кармалган өспүрүмдөр өзбек чек арачылары аларга карата күч колдонгондугун билдиришкен.

Бул факт боюнча кыргыз тараптын демилгеси менен бүгүн, 25-апрелде жолугушуу өткөрүлүп, аталган маселе талкууланды. Өзбек тараптын түшүндүрмөсү боюнча, мал кайтарып жүргөн өспүрүмдөр чек арадан 700 метр аралыкка кирип кетишкен. Ал эми "күч колдонулду" деген билдирүү боюнча текшерүү иштери жүргүзүлөрү жана жакынкы убакыт аралыгында толук жооп кайтарыла тургандыгы убадаланды.