Бүгүн Чемпиондор Лигасынын жарым финалында "Реал" футболдук клубу конокто "Манчестер Ситиге" каршы турат (Анонс)

Бүгүн, 26-апрелде УЕФАнын Чемпиондор Лигасынын жарым финалында алгачкы беттеш орун алат. Манчестер шаарында мадриддик "Реал" клубу "Манчестер Сити" менен оюн өткөрөт.

Акыркы жылдары чейрек финалдан өтө албай келген англиялык клубдардын салтын бузуп, бул жолу "Манчестер Сити" жарым финалга жетти. Бул жетишкендикти клуб өз тарыхында алгачкы жолу багындырды.

"Манчестер Сити" (Англия) - "Реал" (Мадрид, Испания)

Стадион: Манчестер шаары, "Этихад" стадиону

Калыс: Гүнейт Чакыр (Түркия)

Башталышы: 00:45 (Бишкек сааты боюнча)

Мануэль Пеллегрини, "Манчестер Ситинин" башкы машыктыруучусу:

"Биз мелдештин жарым финалына жеткенибизден рахат алышыбыз керек, себеби жыл сайын эле бул баскычка жете бербейбиз. Оюнчулар жарым финалда татыктуу оюн көрсөтүп, финалда ойноого ниеттенип жатышат. Биз атаандаштын жеңиш үчүн гана ойной турганын билебиз. "Манчестер Сити" финалга чыгуу үчүн, албетте, чабуулда мыкты ойноого тийиш".

Зинедин Зидан, "Реалдын" башкы машыктыруучусу:

"Менин командам учурда мыкты спорттук калыпта. Мыкты оюн көрсөтүп, гол киргизип, бирок өз дарбазабызга гол өткөрбөөгө аракет кылабыз. "Манчестер Сити" - мыкты командалардын бири, андыктан "Реал" топ атаандаштын карамагында болгондо мыкты коргонуп, топту алганда чабуулдарды уюштуруусу керек".