Борбор калаада патрулдук милициянын кызматкерлери жол эрежесин бузган айдоочуну кууп баратып жол кырсыгына учурашты

Борбордо патрулдук милициянын кызматкерлери жол эрежесин бузуп, токтобой качып кеткен айдоочуну кууп баратып башка унааны сүзүп кетишти. Бул тууралуу бүгүн, 26-апрелде SUPER.KG порталына Жол-патрулдук милициясынын басма сөз кызматынан билдиришти.

Маалым болгондой, жол кырсыгы саат 12:35 чамасында Шабдан баатыр жана Салиева көчөлөрүнүн кесилишинде орун алган. Анда Жол-патрулдук милициясынын кызматкерлери жол эрежесин бузган айдоочуга токтоо үчүн белги беришкен, бирок ал буйрукка баш ийбей изин жашырууга аракеттенген. Айдоочунун артынан түшкөн кызматкерлер унаа жуучу жайдан чыгып келе жаткан унаа менен сүзүшүп, кийин турак жайдын тосмосун сүзүшкөн. Натыйжада аталган кызматкерлер жана алар сүзүп кеткен унаанын айдоочусу ар түрдүү жаракаттарды алды. Учурда бул окуя боюнча териштирүү иштери жүрүүдө.