Бишкекте күйөөсүн жиликтеген келиндин сот иши белгисиз мөөнөткө жылдырылды

Бүгүн, 27-апрелде Октябрь райондук сотто күйөөсүн жиликтеген 26 жаштагы С.Айдайдын иши боюнча соттук кароо болмок. Иш башка судьянын кароосуна өткөрүлүп, ал бул иш менен толук тааныша электигине байланыштуу белгисиз мөөнөткө жылдырылды. Соттук отурум май айындагы майрамдардан кийинкиге жылдырылып, бирок кайсы күнгө экени айтылган жок.

Буга чейин аталган ишти карап жаткан судья шаардык сотко которулуп кеткендигине байланыштуу башка соттун кароосуна өткөрүлүп, соттук отурум 4-апрелге, андан кийин 27-апрелге жылдырылган.

Айта кетсек, 2015-жылы 14-августта Бишкектин 5-кичи районунда таштанды челектеринин биринен эркек адамдын дене бөлүктөрү: кесилген колдору жана буттары табылган. Анын эртеси өлтүрүлгөн адамдын башы Фучик көчөсүнөн, чемоданга салынган денесинин дагы бир бөлүгү борбордогу чайканалардын биринин жанынан табылган. Тергөөнүн жүрүшүндө кылмышка шектүү катары маркумдун аялы 18-августта кармалып, ал кылмышын моюнуна алып, күйөөсү экөөнүн ортосунда уруш чыгып, аны бычактап, кийин жиликтеп салганын билдирген. Айыпталуучу менен маркум Эрлан Оркошов 4 жыл бирге жашашкан, ортосунда 2 уулу бар.