Жалал-Абад облусунда алдамчылык фактыларына шектелип издөөдө жүргөн аял борбор калаадан кармалды

Жалал-Абад облусунда алдамчылык фактыларына шектелип издөөдө жүргөн аял Бишкектен кармалды. Бул тууралуу бүгүн, 27-апрелде Жалал-Абад облустук ички иштер башкармалыгынан билдиришти.

Маалыматка ылайык, Жалал-Абад шаарынын 42 жаштагы А.Г. аттуу тургуну К.Х. аттуу аялга өз үйүн сатам деген шылтоо менен 15 миң доллар акчасын алып, изин жашырып кеткен. Ал эми башка тааныштарына Audi S4 үлгүсүндөгү унаасын сатмак болуп 3800 долларын алып, качып кеткен. Шаардагы дүкөндөрдүн биринен жалпы суммасы 1080 долларды түзгөн жылыткычтарды алып, мында да акчасын бербей изин жашырып кеткен.

Бул фактылар боюнча кылмыш иштери козголуп, 2015-жылдын 4-ноябрында аталган аялга издөө жарыяланган. Жүргүзүлгөн ыкчам иликтөө иштеринин алкагында издөөдөгү аял Бишкектен кармалган. Ал Жалал-Абадга алынып келинип, убактылуу кармоочу жайга киргизилди. Учурда тергөө амалдары жүрүүдө.