Спикерди шайлоонун жашыруун добуш берүү процедурасында депутат фотографтан сыртка чыгууну талап кылды

Бүгүн, 27-апрелде Жогорку Кеңештин жыйынында спикерди шайлоо процесси өтүп жатат. Анын жүрүшүндө талапкерлер КСДПнын лидери Чыныбай Турсунбеков менен "Өнүгүү-Прогресс" фракциясынан депутат Исхак Масалиев өз программалары менен депутаттарды тааныштырышты. Андан соң талапкерлер депутаттардын суроолоруна жооп беришти.

Учурда шайлоонун жашыруун добуш берүү процедурасы өтүүдө. Эсептөө комиссиясынын төрагасы Мирлан Жээнчороевдин айтымында, ар бир бюллетенде белги коюуга 3 жер бар: эки талапкердин аты-жөнүнүн жанында жана "баарына каршы" деген жазуунун жанында. Мындан тышкары Жээнчороев депутаттарды добуш берүү кабинасына уюлдук телефонсуз барууга чакырды.

Добуш берүүнүн жүрүшүндө "Өнүгүү-Прогресстин" лидери Бакыт Төрөбаев аталган кабина тарапта сүрөт тартып жаткан фотографтан сыртка чыгууну талап кылды.