Оор атлетика боюнча Өзбекстанда өтүп жаткан Азия чемпиондугунда кыргыз спортчусу алтын медалды багындырды

Өзбекстандын Ташкент шаарында оор атлетика боюнча Азия чемпиондугу өтүп жатат. Мелдеш алкагында кыргыз спортчулары алгачкы медалды камсыздаганга жетишти.

Кыргыз спортчусу Иззат Артыков 69 килограмм салмакта күч сынап, алтын медаль тагынды. Ал жулкуп көтөрүүдө 3 аракетти тең ийгиликтүү ишке ашырды. Алгач 143 килограммды, анан 147 килограммды жулкуп көтөрүп, аягында 150 килограммды көтөрдү. Кытайлык спортчу Юан Ченгфей 150 килограмм келген штанганы көтөргөнү менен, спортчулардын салмагына карай келгенде ал атаандашынан оор болуп чыкты. Жыйынтыгында "кичи алтынды" кыргыз спортчусу багындырды.

Кошумчалай кетсек, аталган мелдеште командалык эсепте алдынкы бештикке кирген улуттук курамаларга "Рио-де-Жанейро-2016" Олимпиадасына жолдомо берилет.