Кыргыздар атактуу футболчу Самуэль Это`ого калпак кийгизип, кийиктин шыйрагына сапталган камчы белек кылышты

Атактуу футболчу Самуэль Это`о кыргыздардын колунан ак калпак кийип, белекке камчы алды. Бул тууралуу түркиялык басылмалар жазып чыгышты.

Маалыматка ылайык, 12 жашка чейинки курактагы футболчулардан түзүлгөн Кыргыз Республикасынын өспүрүмдөр курамасы Түркияда мелдешке катышкан. Мелдеш алкагында алар "Анталияспор" футболдук клубунун машыгуусуна күбө болушкан. Машыгуудан кийин алар Это`ого ак калпак кийгизип, кийиктин шыйрагына алакандалып сапталган камчы белек кылышты.

Кошумчалай кетсек, чет элдик атактууларга калпак кийгизүү апта ичинде 2-ирет орун алды. Буга чейин 24-апрелде легендарлуу "Спартак" футболдук клубунун оюнчуларынын кол тамга-сессиясында Сальватор Боккетти, Ивелин Попов жана Квинси Промес "Кыргызстан" деген жазуусу бар ак калпак кийишкен.