Сузакта жер көчкүнүн алдында калып, изделип жаткан өспүрүмдүн жансыз денеси табылды

Жалал-Абад облусунун Сузак районундагы Кызыл-Туу айыл аймагындагы жер көчкүнүн алдында калып, изделип жаткан өспүрүмдүн жансыз денеси табылды. Бул тууралуу бүгүн, 28-апрелде Өзгөчө кырдаалдар министрлигинен билдиришти.

Маалыматка ылайык, 27-апрелде саат 17:30 чамасында Алмалуу-Булак айылынын Үч-Чат жайлоосунда жер көчкү түшүп, убактылуу жашоого салынган үйдү басып калган. Жер көчкү түшкөн учурда 3 адам (1 аял жана 2 бала) кашаа тосуп жүрүшкөн. 2000-жылы туулган Урматбек уулу Эрлан көчкүнүн алдында калып, жанында жүргөн аял менен бала качып кетүүгө үлгүргөн. Кечээтен бери жүргүзүлгөн издөө-куткаруу иштеринин алкагында бүгүн саат 16:13 чамасында көчкүнүн алдынан өспүрүмдүн жансыз денеси табылды.