Ала-Буканын тургундары Сирияга кетүүгө аракеттенген үй-бүлөнүн айылдан көчүп кетүүсүн талап кылышкан, бирок айыл өкмөтү алардын көчүрүлбөй турганын айтты

Сирияга кетүүгө аракеттенген үй-бүлө Ала-Букадан көчүрүлбөйт. Бул тууралуу Төрөгелди Балтагулов атындагы айыл аймагынын башчысы Мамадалы Парпиев бүгүн, 29-апрелде SUPER.KG порталына билдирди.

"Сирияга кетүүгө аракет жасаган үй-бүлөнү айылдан чыгаруу боюнча айыл тургундары айыл өкмөткө жана айылдык кеңештин депутаттарына кайрылышкан. Бул боюнча тез аранын ичинде депутаттык комиссия түзүлүп, маселени карап чыгууну баштады. Бирок ал үй-бүлөнү айылдан чыгарып жиберүүгө мыйзам жол бербейт. Мыйзам чегинде чара көрүү боюнча тиешелүү органдарга кат жолдойбуз", - деп билдирди М.Парпиев.

Ала-Бука районунун Кажар айылынын тургуну Мавлюда Шараповага "3 кызы жана кичинекей небереси менен Түркия аркылуу Сирияга өтүп кетүүгө аракет жасаган" деген күнөө коюлуп, айыл эли жалпы үй-бүлө мүчөлөрүнүн айылдан чыгып кетишин талап кылган.