Үч баласы менен аялын үйүнөн кууп чыккан жеке ишкер Сариевге кылмыш иши козголду

Жеке ишкер Нарынбек Сариев “ири суммадагы акча каражатын насыяга алып, кепил адам катары аялынын колун жасалма түрүндө койдурган” деп шектелип, ага карата кылмыш иши козголду. Бул тууралуу бүгүн, 29-апрелде SUPER.KG порталына ишкердин жубайы Анара Сариева билдирди.

"2013-жылдын 27-августунда Нарынбек Сариев Бишкек шаарындагы банктардын биринен 39 миллион 900 миң сом акча каражатын насыяга алган. Ал кепил болуучу адам катары мени жаздырып, уруксатым жок жасалмалап кол койдуруу менен алганы маалым болду. Нарынбек Сариевдин бул кылган ишин айтып, милицияга арыз менен кайрылгам. Аталган факт боюнча териштирүү иштеринин алкагында алган насыяга кепил катары кол койбогондугум анык болду. Ошол себептен Нарынбек Сариевге карата “документтерди, мамлекеттик сыйлыктарды, штамптарды, мөөрлөрдү, бланктарды колго жасоо, даярдоо, сатуу же алардын жасалмаларын пайдалануу” беренеси менен кылмыш иши 27-апрелде козголду. Тергөө иштери жүрүп жатат", - деди ал.

Эскерте кетсек, буга чейин жеке ишкер жубайын балдары менен үйүнөн кубалап, киргизбей жатканы тууралуу Анара Сариева билдирген.