Орусиянын депутаттары жарандарга орусча фамилия берүүнү токтоткон Тажикстан менен виза режимин киргизүүнү сунушташты

29-апрелде Тажикстанда орусча фамилия берүү токтотулганы тууралуу жаңылык тараган. Бул көрүнүш боюнча Орусия тарап расмий түрдө үн ката элек, бирок Орусиянын Мамлекеттик Думасында бул көрүнүш сынга алынды.

Орусиялык басылмалар кабарлашкандай, Мамлекеттик Думада Тажикстан менен виза режимин киргизүүнү сунушташты. Бул сунуш Мамлекеттик Думанын КМШ, евразиялык интеграция жана чет жердеги жердештер менен байланышты камсыздоо комитетинин мүчөсү Илья Дроздовго таандык.

Анын айтымында, Тажикстандын бүгүнкү күндөгү абалы толугу менен Орусиядан көз каранды. Орусиядагы эмгек мигранттары Тажикстанга акча которуп жатканы буга мисал. "Орусиянын мамлекет башында турган адамдарынын бири тажик бийлиги менен байланышып, Тажикстан үчүн чек араны жаап, виза режимин киргизсе, чатак болорун акырын билдиргени жетиштүү. Андан кийин тажик жарандары катары менен Иванов, Петров болуп чыга келишет", - дейт ал.

Кошумчалай кетсек, буга чейин Тажикстанда орусча фамилия берүү токтотулуп, эми жарандар “-ов”, “-ова” мүчөсү менен аяктаган фамилия ала алышпай турганы маалымдалган.