Аксы. Жаңгак айылында Түштүк Кореянын долбоору аркылуу 126 миң сомдук суу насосу орнотулуп жатат, бул 45 гектар жерди сугат суу менен камсыз кылат

Аксынын Жаңгак айылынын эли Түштүк Корея өлкөсү менен кызматташат. Бул тууралуу бүгүн, 2-майда SUPER.KG порталына "Жаңы айыл" долбоорунун жетекчиси Кубаныч Карабаев билдирди.

"Корея Республикасынын "Жаңы айыл" долбоору аркылуу 126 миң сомдук суу насосун орнотуп жатабыз. Жакында 45 гектар жерибиз сугат суу менен камсыз болот. Мындан сырткары 50 кожолук эл таза суу иче баштайт. Айылыбызда ички арыктар, алыштар цементтелип, таштандылар чыгарыла баштады. Мындай долбоорду айылдыктар колдоого алып, 70 миң сомдук кол күчүн жумшады", - деп билдирди К.Карабаев.

"Жаңгак айылында 200 кожолук эл жашайт. Айылда таза суу түтүгү 1975-жылы 5 чакырым аралыктагы Мундуз айылынан тартылып келинген. Учурда эскилиги жетип, суу түтүктөрү тешилип, айыл элин таза суу менен камсыздай албай калды. Жакынкы аралыкта таза суу долбоорун ишке ашырбаса, Жаңгак айылында суу жетишсиздиги коркунучу жаралат", - дейт айыл тургуну Убайдилла Тургунов.