Орусияда Кыргыз Республикасынын желеги желбиреди

Орусиянын Хабаровск шаарында спорттун волейбол түрү боюнча эл аралык мелдеш өткөрүлдү. Бул тууралуу бүгүн, 2-майда SUPER.KG порталына Хабаровск шаарындагы кыргыз диаспорасынын басма сөз кызматы билдирди.

Мелдеште Кыргыз Республикасы, Орусия жана Тажикстан өлкөлөрүнүн атынан 8 команда күч сынашты. Жыйынтыгында Кыргыз Республикасынын атынан барган Ош шаарынын "Ош" командасы биринчиликти камсыздады. Ал эми 2-орунга Петропавловск-Камчатск аймагынан келген "Аэронавигация" командасы чыкты.

"Жыл сайын салтка айланып бараткан мелдеш быйыл үчүнчү ирет өткөрүлдү. Мелдештин бирден-бир максаты - бир шаарда жашаган ар башка улуттагы жарандардын ынтымагын арттыруу, достукту бекемдеп, алаканы чыңдоо", - дейт басма сөз кызматы.

Спорттук мелдештин байге фондун Хабаровск шаарында жашап жаткан кыргыздар чогултушкан.