Машыктыруучу: "Республикалык Спартакиадага катыша турган окуучулар тамак-аш жана жатакана акысын өздөрү төлөөгө аргасыз"

Нарында өтчү Республикалык Спартакиадага катыша турган окуучулар тамак-аш жана жатакана акысын өздөрү төлөөгө аргасыз. Бул тууралуу SUPER.KG порталына Ош облусунун Кара-Суу районунан улуттук күрөш боюнча машыктыруучу Каныбек Сыдыков билдирди.

Анын айтымында, уюштуруучулар тарабынан окуучуларды ары-бери ташууга жардам көрсөтүлөт. "Өкмөт бул маселеге көңүл бурса жакшы болмок. Айрым ата-энелер акча маселесинен улам балдарын Спартакиадага катыштырбоону туура көрүшүүдө, анткени жеңүүчүлөргө болгону диплом эле берилет", - деди машыктыруучу.

Айта кетсек, 4-7-май күндөрү Нарын шаарында мектеп окуучуларынын Республикалык Спартакиадасы өтөт. Мелдешке жети облус жана Бишкек, Ош шаарларынан 450 окуучунун катышары күтүлүүдө. Ал спорттун 6 түрү боюнча өткөрүлөт: шахмат, улуттук күрөш, эркин күрөш, грек-рим күрөшү, стол үстүндөгү теннис жана ордо. Учурда мелдеш өтчү жайды даярдоо иштери жүрүп жатат.

Аталган мелдеш Тарых жана маданият жылына, Кыргыз Республикасынын эгемендүүлүгүнүн 25 жылдыгына карата уюштурулууда.