Акчалуу, абройлуу клубдарды артта калтырып, "Лестер" футболдук клубу Англия Премьер-лигасында чемпион аталды

3-майга караган түнү Англия Премьер-лигасынын 36-турунда "Тоттенхэм" жана "Челси" клубдары 2:2 эсебинде ойноп, бирден упайга ээ болушту. Тең чыгуу чемпиондук үчүн жарышта башкы атаандашы "Тоттенхэмди" 7 упай артта калтырган "Лестердин" мөөнөтүнөн мурун чемпион болуусун шарттады.

Клаудио Раньери машыктырган команда курам 38 турдан турган чемпиондуктун 22-турунда лидерлик сапка көтөрүлгөн. Ошол бойдон алар чемпиондукка жете алышты.

Акыркы эки турда "Лестердин" атаандаштары "Эвертон" жана "Челси" футболдук клубдары болмокчу. Бул оюндардын жыйынтыгы эч кандай мааниге ээ эмес.

Кошумчалай кетсек, мелдеш жыйынтыкталарына 2 гана тур калды. "Лестердин" эсебинде 77 упай бар. Ал эми "Тоттенхэмде" 70 упай болуп, лидерди упай катыштыгында кубалап жетүү мүмкүнчүлүгүнөн ажырады.

"Лестер" Англия Премьер-лигасында өткөн жылы 14-орунду ээлеген. Быйыл болсо өз тарыхында алгачкы жолу аталган лигада чемпион аталды.