СУПЕРСТАН: "Уулумду төрөп жатканда толгоо келгенде ыйлап жерде жөрмөлөп жүрө бергем"

SUPER.KG порталынын "Суперстан" бөлүмүндө "Төрөтканадагы кызыктар" деген тема талкууланууда.

Темадагы билдирүүлөрдөн:

"Кечээ жеңем эгиз төрөдү. Мурда 4 кыз төрөгөн, мунусу экөө тең уул болуп аябай кыйналды. Креслодо жатат кыйкырып "кескиле, мен төрөй албайм" деп, агам кыжалат болуп кирсе, жеңем "пачагыңды" чыгарам сенин" деп кыйкырат. "Уулду оңой төрөйсүң" деп неге мени алдадыңар?" деп кыйкырат, анан акыры төрөдү".

"Бир адамдын ичинен бир жандын чыгышы оңой эмес да. Мен ичиме сактап, кыйкыра албай, жаткан жеримди муштум менен ургулай бергем. Же ордумдан тура албайм, байлап коюшкан. Бөлмөдө жалгызмын же түшө албайм, телефон чалып бирөөнү чакырайын десем. Акыры жарым саат калганда дарыгерлер кирип келишкен, сүйүнө түштүм, "бир аз жеңилдетет" деп укол сайышты. Толгоо келген сайын ыйын деп жатышып уул төрөгөм. Алым куруп, оозум кургап, "экинчи төрөбөйм" деп чыккам".

"Мен биринчи уулумда үч күн толготконмун, бирок кыйкырбай эле ыйлап жерде жөрмөлөп жүрө бергем. Үчүнчү күнү такыр айлам кетип "кесарево кылгылачы" деп сурансам "өзүң төрөйсүң" деп макул болбой коюшкан. Таңдын атышын ушунчалык күтөм, азанды күтөм, азан айтылса эле таң атат, таң атса эле төрөйм деп өзүмдү ишендирип алгам. Анан саат 5ке жакын төрөдүм".

"Байкуш аялдар ит жандуу эле болобуз. Жаныбыз кыйналып көл-шал болуп, үнүбүз Кудайга жетсе да, төрөгөндөн кийин дароо эле балдарыбызды эркелетип койгонубузчу".

Талкууга кошулгуңуз келсе бул жакка кириңиз.