Аксы. Күрп-Сай, Кызыл-Бейит, Кургакты айылдарында эл электр жарыгысыз жашайт

Аксы районунун Ак-Жол айыл аймагына караштуу Күрп-Сай, Кызыл-Бейит, Кургакты айылдарында электр энергиясы жок. Бул тууралуу бүгүн, 4-майда SUPER.KG порталына Ак-Жол айыл аймагынын башчысынын орун басары Келдейбай Сатыбеков билдирди.

"Күрп-Сай, Кызыл-Бейит, Кургакты айылдарында электр чубалгылары тартылган эмес. Айылдыктар техникалык прогресстен артта калышты. Маалымат угуу, гезит окуу деген түшүнүктөн алыс калышты. К.Бакиев өлкө башында турганда канча электр мамысы керектелет, канча трансформатор орнотууга болот, ушул сыяктуу чыгымдары такталып, жалпы 36 миллион сом жумшалары аныкталган. Андан бери аракет кылган киши жок. Айыл аймактын атынан жыл сайын тийиштүү органдарга 5-6 жолу кат жазабыз. Жыйынтык жок. Айыл өкмөт эмес, облустук деңгээлде чечилчү маселе эмес. Республикалык масштабда иш-аракеттерди жүргүзүү зарыл", - дейт К.Сатыбеков.

Эскерте кетсек, Күрп-Сай айылында 22 кожолук, Кызыл-Бейит, Кургакты айылдарында 117 кожолук жашайт. Аталган айылдарда калктын жайгашуусу 1850-1900-жылдарга туура келет.