Футболчу Лионель Мессиден сыйлыкка футболка алган ооганстандык баланын үй-бүлөсү өлкөдөн качып кетүүгө мажбур болду

Футболчу Лионель Мессиден сыйлыкка футболка алган ооганстандык Муртаза Ахмадинин үй-бүлөсү Ооганстандан качып кетүүгө мажбур болду. Бул тууралуу чет элдик маалымат булактары кабарлайт.

Маалыматка ылайык, мунун себебин анын атасы Мохаммад Ариф Ахмади белгисиз бирөөлөр телефон аркылуу коркутуп жатканы менен түшүндүрдү. Бирок ал коркуткандар эмне талап кылып жатышканы тууралуу ооз ачкан эмес. "Менин уулум тууралуу дүйнөлүк басылмалар жазып чыккандан кийин телефон аркылуу коркутуулар көбөйдү. Биз өлкөнү таштап, Пакистанга качкандан башка арга таба алган жокпуз", - дейт ал.

Ахмадинин үй-бүлөсү БУУнун Качкындар боюнча агенттигине кайрылган. Алар убактылуу Пакистанда болуп турушат. Баланын атасы жакынкы арада коопсуз мамлекеттердин бирине көчүрүүнү суранып жатат.