Чемпиондор Лигасынын финалында "Реал" жана "Атлетико" футболдук клубдары беттешет

5-майга караган түнү мадриддик "Реал" футболдук клубу өз үйүндө англиялык "Манчестер Ситини" 1:0 эсебинде утуп алды. Алгачкы оюнда 0:0 эсеби катталганын эске алсак, бул минималдуу эсептеги жеңиш "Реалдын" финалга чыгуусун камсыздады.

"Реал" (Испания) - "Манчестер Сити" (Англия) - 1:0

Гол: Фернандо (20-мүнөттө, өз дарбазасына)

Андыктан Чемпиондор Лигасынын 2015-2016-жылкы сезонунун финалында испаниялык клубдар "Атлетико" менен "Реал" беттешет. Финалдык беттеш 28-майда Италиянын Милан шаарында "Сан-Сиро - Жузеппе Меацца" стадионунда орун алат.

"Атлетико" жарым финалда германиялык "Баварияны" утуп (биринчи оюнда 1:0 эсебинде утса, жооптук оюнда 2:1 эсебинде утулду), финалга чыккан.

Кошумчалай кетсек, "Реал" менен "Атлетико" 2014-жылы Чемпиондор Лигасынын финалында кез келишкен. Анда 4:1 эсебинде "Реалдын" футболчулары жеңишке жетишкен.