Бишкекте "небересин катуу ур-токмокко алган" деген шек менен кармалган аялдын күнөөсү далилденген жок

Бишкекте "небересин катуу ур-токмокко алган" деген шек менен кармалган аялдын күнөөсү далилденген жок. Бул тууралуу бүгүн, 6-майда SUPER.KG порталына күч органдарындагы өздүк булактар билдиришти.

Кечээ, 5-май күнү Бишкек шаарынын Бегимай Исаева аттуу тургуну "Фейсбуктагы" өзүнүн баракчасына маалымат калтырган. Анда ал анын бир кабат ылдый жашаган кошунасы кызын катуу сабап жатканын билдирген. "Элдер! Менин бир кабат ылдый жашаган коңшум пайда болду. Ал кичинекей небереси менен 6-кичи райондо жашайт. Аял спирттик ичимдиктерди ичип, небересин катуу сабап жатат. Кыз ыйлай берет, анын дайыма кечирим сурап жатканы угулат", - деп билдирген Исаева.

"Бул билдирүүнүн негизинде аталган дарекке аймактык тескөөчү, Жашы жете элек балдар менен иштөө боюнча инспекциянын өкүлү барып тиешелүү иш-чараларды өткөргөн. Иликтөө иштеринин алкагында ал аял кыздын таенеси экени аныкталган. Кыз №3-шаардык балдар ооруканасына жеткирилип, дарыгерлердин кароосунан өткөрүлгөн. Дарыгерлер анын денесинен эч кандай жаракат, көк ала тактарды тапкан эмес. Алар кыз ыйлаак, чыргоо экенин да кошумчалашкан. Ошол себептен улам кыз таенеси менен үйүнө жиберилген", - деп билдиришти күч органдарынан.