Баткен облусунда болгон катуу шамал турак жайлардын шиферлерин учуруп кетти

Баткен облусунда болгон катуу шамалдын кесепетинен турак жайлардан жана социалдык жайлардан 4667 даана шифер зыянга учурады. Бул тууралуу бүгүн, 9-майда Өзгөчө кырдаалдар министрлигинин басма сөз кызматынан билдиришти.

Маалым болгондой, Баткен облусунун Лейлек районунда 9-майга караган түнү саат 02:50дөн 03:50гө чейин ылдамдыгы секундасына 28 метрге чейин жеткен катуу шамал катталып, бир канча объектинин чатырлары жараксыз абалга келгени белгилүү болду. Кулунду айыл аймагынан 120 турак үйдүн 1310 даана шиферин, 4 социалдык объектинин 355 даана шиферин учуруп кетти. Ошондой эле Маргун айыл аймагынан 51 турак үйдөн 687 даана шифер, 2 социалдык объектиден 40 даана шифер талкаланганы маалым болду. Буга окшогон кырсыктар аталган райондун ар бир айылында катталганы айтылууда.

Учурда жарандык коргонуу комиссиясы тарабынан иликтөө иштери жүргүзүлүп жатат.