Бразилиялык футболчу Ривалдо: "Спорт сүйүүчүлөрү "Рио-де-Жанейро-2016" Олимпиадасын көрүүгө келишпесин, бул шаар өтө кооптуу"

Бразилия курама командасы менен 2002-жылы Дүйнө чемпиондугун уткан атактуу футболчу Ривалдо Рио-де-Жанейро шаарында баш аламандык дагы да болсо өкүм сүрүп жатканын айтты. Анын пикиринде, быйыл Олимпиада оюндары өтө турган шаарга келүү спорт сүйүүчүлөрү үчүн өтө кооптуу.

"Рио шаарында бандиттер 17 жаштагы кызды өлтүрүп кетишти. Шаарда кырдаал өтө курч. Келгендердин да өмүрүнө коркунуч келет. Саламаттыкты сактоо, саясий баш аламандык тууралуу ооз ачпай деле койсо болот. Бул көйгөйлөрдү Кудайдан башка эч ким чече албайт", - дейт футболчу.

Рио-де-Жанейро шаарынын кооптуулугу тууралуу жар салгандар акыркы кезде көп болууда. Мисалы, жакында интернетте шаарда чак түштө көз көрүнө уурулук кылган өспүрүмдөр тууралуу видео тараган. Анда өспүрүмдөрдүн көчөдөгү адамдардын баалуу буюмдарын тартып алып качып кеткендерин көрүүгө болот. Аларды токтоткон коопсуздук кызматы видеодо көрүнбөйт.

Кошумчалай кетсек, "Рио-де-Жанейро-2016" Олимпиадасы 5-августта башталып, 21-августта жыйынтыкталат.