Спортчу Виктория Полюдина "Рио-де-Жанейро-2016" Олимпиадасына жолдомо алган 12-спортчу болду

Кыргыз спортчусу, жеңил атлет Виктория Полюдина "Рио-де-Жанейро-2016" Олимпиадасына жолдомо алды. Бул тууралуу КРнын Жеңил атлетика федерациясынан кабарлашты.

Маалыматка ылайык, спортчу 8-майда Чехияда өткөн марафонго катышкан. Мелдеште 42 чакырым 195 метр аралыкты 2 саат 45 мүнөттө чуркап өткөн спортчулар Олимпиада оюндарынын нормативин толтуруп, жолдомо алышмак. Виктория бул аралыкты 2 саат 40 мүнөт жана 36 секундада артта калтырган. Жалпы калың топто ал 10-орунду багындырды.

Айта кетсек, бул жолдомону эсепке алганда, кыргыз спортчулары Олимпиадага 12 жолдомо камсыздашты. Буга чейин жеңил атлетчилер Мария Карабицкая, Юлия Андреева, Дарья Маслова, грек-рим күрөшүнөн Арсен Эралиев, Жанарбек Кенжеев, Мурат Рамонов, Руслан Царев, эркин күрөштөн Магомед Мусаев, кыз-келиндер күрөшүнөн Айсулуу Тыныбекова, мушкер Эркин Адылбек уулу жана оор атлетика боюнча улуттук курам Олимпиада оюндарына жолдомо алган.