Орусияга кыргыз жеринен ата-энеси менен конокко барып чарчап калган 2 жашар кыз оорудан улам каза болушу мүмкүн

Санкт-Петербург шаарына кыргыз жеринен ата-энеси менен конокко барып чарчап калган 2 жашар кыз оорудан улам каза болушу мүмкүн. Мындай жыйынтыкты дарыгерлер чыгаргандыгын жана ушул эле ойду учурда тергөөчүлөр да карманып жатышкандыгын орусиялык басылмалар жазып чыгышты.

Маалыматка ылайык, 9-май күнү аталган шаардагы Лиговкс кең көчөсүндө жайгашкан батирлердин биринен ата-энеси менен конокко келген 2 жашар Зарина аттуу кыз белгисиз себептерден улам чарчап калган. Кыздын ата-энеси наристеси дем албай калганын саат 16:00 чамасында байкаган. Аталган дарекке келген дарыгерлер кыздын денесинен эч кандай жаракат же көк ала тактарды табышкан эмес.

Мамлекеттик тергөө башкармалыгынын маалыматына ылайык, бул факт боюнча соттук-медициналык экспертиза дайындалган. Алдын ала маалыматтарга ылайык, чарчап калган наристе кыргыз өлкөсүнүн жараны жана 8-май күнү 2 жашка толгон.