Жанарбек Кенжеев: "Допинг колдонгон эмесмин, баары жайында, мен Олимпиадага барам"

11-майда Бириккен күрөш дүйнөсү уюму (UWW) допинг колдонгондорун аныктап, жолдомо уткан 7 спортчунун жолдомосун жокко чыгарды. Ал жолдомолор башка спортчуларга берилди. Алардын катарында кыргыз балбаны Жанарбек Кенжеев да болгон.

Аталган уюм Жанарбек Кенжеевдин мельдоний препаратын колдонгонун билдирген. Жыйынтыгында 85 килограмм салмакта күрөшкөн балбаныбыздын жолдомосу индиялык Равондер Хатриге берилгени маалымдалды.

SUPER.KG порталы балбанга байланышка чыгып, окуя тууралуу кабар алды. Жанарбек Кенжеев төмөнкүлөргө токтолду: "Мен эч кандай допинг колдонгон эмесмин. Интернеттен өзүм тууралуу жаңылыктарды окудум, баарынан кабарым бар. Кыргыз элин бушайман болбоого чакырам, мен Олимпиада оюндарына барам".